The Accord: Mga Unang Haligi [Filipino]

Sa isang maliit na silid, sa loob ng isang maayos at disenteng tahanan na naging bunga ng sariling pagsisikap.Isang maliit na silid lamang ngunit ang nasa loob ay isang malawak na pag-iisip Sa mesa nakapatong ang isang notebook, gusot at luma na ang likod, parang pagod na katawan na matagal nang naglakbay. Bawat pahina’y unti-unting binubuksan niya, hindi dahil nag-aalangan siya, kundi dahil ang mga nakasulat rito ay maaring maging bahagi ng kasaysayan o ng hinaharap. Dumampi ang panulat sa papel, tatlong beses na hinipo niya ang dulo bago isulat sa tahimik na sulat: "Kung bibigyan ng dahilan ang tao para mag-malasakitan sa isa’t isa, gagawin nila.Kung ang katotohanan ay mabilis, pipiliin nilang maging makatarungan.Kung bibigyan sila ng kapangyarihan nang walang karahasan, gagamitin nila ito nang walang kahihiyan." Tumigil siya sandali. Tahimik ang gabi. Walang ingay ng anumang kaguluhan o kaapihan sa paligid. Ngunit sa labas, naguguluhan ang sangkatauhan— korapsyon, karahasan, kasakiman at mga krimen na hindi mabigyan ng katarungan dahil sa makupad na sistemang umiiral. Sinimulan niyang isulat muli: "Paano kung may sistema na nagpaparangal sa kabutihan gaya ng pagpaparangal ng mundo sa kasakiman?Paano kung ang kapangyarihan ay nasa mga ordinaryong tao?Paano kung mas murang gawin ang katotohan kaysa kasinungalingan?" Ipinako niya ang linyang iyon sa notebook, sa diary, mga titik na sa ngayon ay imahinasyon lamang at sa tingin niya ay hindi maisasakatuparan.Hindi sa panahong ito, kung saan naghahari ang kawalang katarungan at mas nananaig ang kasinungalingan kaysa sa katotohan. Huminga siya ng malalim at bumulong sa hangin: “Isang araw, kung bibigyan ako ng pagkakataon, maari pang magbago ang takbo ng mundo.” Sa huling linya ng pahina, isinulat niya ang isang salita: Illustrado Isinara niya ang notebook. Hininga niya’y lumabas.Pumikit siya sa dilim. Ninanamnam ang tahimik na mundo. Ngunit sa mga darating na araw, sa hindi inaasahang pangyayari, ang imahinasyon niya, ang sistemang naiisip niya, ay magkakaroon ng katuparan.